Күптән түгел Өфөлә, «Торатау» конгресс-холында республика һәм сиктәш төбәктәрҙән тыуған ере, халҡының үткәне менән ҡыҙыҡһынғандар, Башҡортостан һәм Рәсәй тарихсылары ҡатнашлығында Тыуған яҡты өйрәнеүселәр форумы үткәйне. Ошо Форум ҡарарына ярашлы, Ейәнсура районында “түңәрәк өҫтәл” ойошторолдо. Тыуған яҡты өйрәнеү һәм тарих музейы директоры, райондың тыуған яҡты өйрәнеүселәр йәмғиәте етәксеһе Миҙхәт Аҫылбаев алып барған сараға тыуған төйәгебеҙ, телебеҙ киләсәгенә битараф булмағандар саҡырылды. Район ағинәйҙәр ҡоро етәксеһе Нурия Ҡунысбаева, тыуған яҡты өйрәнеү буйынса күп эштәр башҡарған, китаптар сығарған аҡһаҡал Марат Түләбаев, Сәғит ауылы эҙәрмәне, илһөйәр Ришат Ҡыуатов, Яңы Себенле уҙаманы, төйәгенең тарихы буйынса эҙләнеүсе Марат Сабиров, Күгәрсен һәм Таҙлар мәктәптәре янында эшләп килгән музей етәкселәре Лениза Төхвәтуллина менән Илзирә Дүшәнбаева, Үтәғол ауыл китапханасыһы Фәүзиә Йосопова һәм “Ейәнсура таңдары” район гәзите баш мөхәррире Әлмира Әйүпова «Башҡорт халҡының 2021-2031 йылдарға үҫеш стратегияһы» программаһы буйынса фекер алышты.
Халҡыбыҙҙың, телдең киләсәге тураһында һүҙ барғанда йәмәғәт ойошмаларының, мәғариф, музей, китапхана хеҙмәткәрҙәренең, илһөйәр һәм телһөйөрҙәрҙең әүҙемлеге генә етмәй, ә ойошторолған сараларҙы финанслауҙа дәүләт яғынан да яҡлау кәрәклеген билдәләнде.
Сара һуңында резолюция ҡабул ителде һәм тыуған яҡты, тарихы өйрәнеүҙә әүҙем эшмәкәрлек алып барған Марат Түләбаев, Марат Сабиров һәм Ришат Ҡыуатовҡа музейҙың Рәхмәт хаттары тапшырылды.
"Ейәнсура таңдары"